[Panfleto] ByA y Barbaria – Nas eleccións só se vota capitalismo

Descargar o panfleto en pdf

A nova convocatoria de eleccións xerais non é casual. O goberno, animado polas mobilizacións e as acampadas contra os desafiuzamentos e os problemas da vivenda, considerou que era un momento propicio para convocalas. Outro ano máis invítase á cita democrática de revalidación dos escanos para os flamantes congresistas e senadores que, non nos cabe ningunha dúbida, nos próximos 4 anos encargaranse por todos os medios de exercer moi ben a súa única función: xestionar, para beneficio propio e da clase capitalista, a miseria da clase traballadora.

O novo espectáculo está servido: por unha banda unha dereita facheandeira e envalentonada cos seus discursos xenófobos e en favor da austeridade económica, polo outro unha esquerda que se presenta como valedora dos dereitos sociais “conquistados”. A experiencia de oito anos de goberno de esquerdas invítanos a non ter ningunha concesión nin conciliación cunha esquerda que se comprometeu sen ningún titubeo coa estabilización dos mecanismos de explotación e dominación do capital. Nada se elixe nos Parlamentos máis que os portavoces do sistema que diariamente nos desafiuzan, nos reprimen, nos deportan, en fin, que negan a nosa propia emancipación e o noso futuro.

Responderásenos que ante os hipotéticos temores dunha perigosísima ultradereita do que se trata é de conseguir “un chan firme” desde o cal poidamos preservar os moi poucos e valiosos dereitos políticos que aínda nos quedan. Chamar á abstención á festa da democracia habería de ser considerado un acto de traizón ás ideas de esquerda nun momento histórico decisivo. Pois ben, presentámonos de boa gana como traidores a esa pantomima que por moitas décadas vén conducindo á nosa clase á derrota e a desmobilización máis absoluta.

Tras oito anos de goberno de esquerdas, do goberno “máis progresista da historia”, este goberno, que proclama o seu antirracismo, é o responsable coas súas fronteiras da morte de miles de migrantes no Mediterráneo e os que morreron en Ceuta. Vemos como o goberno aumenta o orzamento militar e o exército dedícase a dar malleiras democráticas a migrantes nunha Ceuta militarizada. O problema da vivenda está peor que nunca e o único que nos venden son as súas leis. Só poden defender o sacrosanto dereito á propiedade privada. A iso hai que engadir unha inflación polas nubes mentres os salarios non nos alcanzan para chegar a fin de mes. O mesmo goberno que hoxe chora pola “traizón” daqueles que votaron en contra dos decretos da vivenda entre 2019 e 2023 conseguiu unha maioría absoluta clara da esquerda no Congreso dos Deputados. Que conseguimos con eses deputados? Dirémolo nunha palabra: nada.

Non se nos perdeu no Congreso nada máis nin nada menos que un chisqueiro co cal prenderlle lume a unha das bases dun sistema que nos condena á miseria e ao que só podemos facer fronte a través da acción social, o enfrontamento colectivo por medio de órganos de loita da clase traballadora e a xeneralización das mobilizacións, protestas e folgas que como clase habemos de soster internacionalmente.

Fronte ao Parlamento, as nosas asembleas de clase. Fronte aos seus decretos, as nosas folgas. Fronte ás súas ameazas, a nosa forza.

CONTRA O ESTADO Y O CAPITAL!

POLA REVOLUCIÓN COMUNISTA MUNDIAL!